ಗುಬ್ಬಿಯ ಜೊತೆ ಸಂವಾದ

ಮುಂಜಾವಿನ ಚಳಿಯಲಿ ನಾ ಹೊರಟೆ ಹಳ್ಳದ ಬದಿಯಲಿ

ಕಿವಿ ತುಂಬಿತು ಹಕ್ಕಿಯ ಚಿಲಿಪಿಲಿ

ಸಂತಸವೇಕೋ ತಿಳಿಯದು ಈ ಮನದಲಿ

ಅಡಗಿದೆ ಏನೋ ಈ ಪ್ರಕೃತಿ ಮಡಿಲಲಿ

ಗುಬ್ಬಿಯು ಒಂದು ನೋಡಿತು ನನ್ನ

ಕೇಳಿತು ಒಬ್ಬನೇ ನಗುತಿರುವ ಕಾರಣವನ್ನ

ಹೇಳಿದೆ ನಾನು "ಸವಿಯುತ್ತಿರುವೆ ಹಳ್ಳಿಯ ಸೊಬಗನ್ನ

ಸಹಿಸಿ ಸಾಕಾಗಿ ನಗರದ ಧೂಳನ್ನ"

ಗುಬ್ಬಿಗೆ ತಿಳಿಯದಾಯಿತು ನನ್ನ ಹೇಳಿಕೆಯ

ಅರೆಘಳಿಗೆ ಯೋಚಿಸಿ ನೀಡಿತೊಂದು ಸಲಹೆಯ

"ಬಿಟ್ಟು ಬಾ ನಗರದ ಆ ಹೊರೆಯ ಮರಳಿ ಸಿಗದು ನಿನಗೆ ಈ ಸಮಯ"

ನಾನು: "ಅಯ್ಯೋ ಗುಬ್ಬಿ! ನನ್ನ ಪಾಡು ನಿನಗೆ ಹೇಗೆ ತಿಳಿದೀತು!

ನಿನ್ನ ಹಾಗೆ ಎರಡು ಧಾನ್ಯ ತಿಂದರೇನು ಹೊಟ್ಟೆ ತುಂಬಿತು!"

ಗುಬ್ಬಿ: "ನಿನ್ನ ಕರ್ಮಕ್ಕೆ ನೀನೇ ಹೊಣೆ

ಹಳ್ಳಿ-ವನವೊಂದೇ ನನ್ನ ಮನೆ, ಬಂದರೂ ಇಲ್ಲಿಗೆ ಮಾಡದಿರು ಇದರ ಕೊನೆ..."